الطقس ايام زمان
زمان كنّا نستنى نظل ع الشبابيك نستنى الثلج واحنا مبسوطين كانه جاي معه سانتا كلوز.. هسّا كل الناس هاكلة هم الثلج..
أيام الثلج الحقيقي ..كانت الممارسات تختلف كليا...
كان الأم والأبو يتابعوا الخرائط الجوية بدون ما يفهموا عليها بس يركزوا مع علي عبنده .. لما كان يشوطح بايده وهو يشرح عن الموجة الجاية من قبرص أو من شمال تركيا.. كان الانبهار والقلق واضح على وجوههم .. لانهم هاكلين هم الخبز والكاز مش المكسرات والكستنا..
كانت تتقسم الأدوار بترتيب من الأبو .. واحد يطلع يتفقد المزراب والثاني يطلع يشد سلاك الشبكة او الأنتين بلاش يتقطّعن من سرعة الهوا.. وواحد يجهز المجرفة والكريك ..
وجوا الدار بتبلش تحضيرات العدس المجروش .. مع نقع الحمص والفول والترمس ( المكسرات والتسالي ) مستلزمات السهرة مع الملح والليمون ...والأهم تجهيز برميل الكاز .. روح جيبلك قلنين كاز وعبيهن ..
بتبلش الموجة جايّه كابسة معها .. عنيفة.. ومحملة ومزملة من الثلج الحقيقي اللي سايق الجرافة يفتح الطريق ويطل بالمرايه يلاقيها سكّرت وراه.. وهون بتبلش تسمع عاد بعض المفاهيم مثل : لدّوا لدّوا قامت تنعث .. يمّه والله بترمي أذان القطاط .. حب عزيز .. هاظ فراش للارض .. سكّرت .. ومن هالحكي ..وبنبلش عاد نتنطنط ع الشباك وهوشات أمي .. وصياحها .. ولكوا اقعدوا اهدوا الله لا يهديكوا ..
أما التلفزيون فما كان الا عمان .. وما نشوف غير هاني البدري وغالب الحديدي وهم يسمّوا المحافظات المغلقة بسبب تراكم الثلوج ..
كنّا نطرب ع أغنية ثلج ثلج بتصوير سيارة التلفزيون عند الجامعة..
بعدين بطلع الله يرحمه مازن القبج وبعطي توجيهاته عن تأثير الثلج على أشجار الزيتون والخوف من تكسرها وكيفية التعامل مع الأنجماد والصقيع والمهندسة الزراعية سمر العزيزي عن وضع النباتات في البرد..
ومن هذيك الأيام كان يطلع الملازم أول فريد الشرع من الدفاع المدني ليحكي كيفية التعامل مع الحالة الجوية والاستخدام الآمن لوسائل التدفئة .. هاد غير لمّة العيلة والسواليف والضحك والأكل والترمس والبليله ولمة الجيران بالحارة واللعب بالثلج .. واحنا لابسين " زروف " بأدينا..
أما عن حالة الطرق .. من خلقنا وهي نفس النشرة😂
اربد ثغرة عصفور مغلقة بسبب تراكم الثلوج . طريق اربد المزار الشمالي مغلقة ،طريق صويلح السلط مغلقة ، طريق راس النقب دبة حانون مغلقة الكرك المزار الجنوبي مغلقة وهلما جرى
بنثلّج العصر من البرد لما تغيب الشمس وكل واحد بنظب بداره وبتبلش المسرحيات المعادة .. العيال كبرت .. شاهد مشافش حاجة .. والمسرحية الأردنية تبعت ربيع شهاب " طيري "
والله يعين الأهل شو كانوا ينقلوا خبز ... زمان والله كنّا نحب الثلج ونستناه .. بكل بساطه.. بس هسّا .. والله انا بنهكل همه.. الثلج ما تغيّر .. بس احنا اللي تغيرنا ..
#سلطي_مزيون ...... منقول
تعليقات
إرسال تعليق